Ekādaśaḥ sargaḥ
Technical Details
ekādaśaḥ sargaḥ
svarga kī hīnatā
tatastā yoṣito dṛṣṭvā nando nandanacāriṇīḥ|
babandha niyamastambhe durdamaṃ capalaṃ manaḥ||1||
so'niṣṭanaiṣkramyaraso mlānatāmarasopamaḥ|
cacāra viraso dharmaṃ niveśyāpsaraso hṛdi||2||
tathā lolendriyo bhūtvā dayitendriyagocaraḥ|
indriyārthavaśādeva babhūva niyatendriyaḥ||3||
kāmacaryāsu kuśalo bhikṣucaryāsu viklavaḥ|
paramācāryaviṣṭabdho brahmacaryeṃ cacāra saḥ||4||
saṃvṛtena ca śāntena tīvreṇa madanena ca|
jalāgneriva saṃsargācchaśāma ca śuśoṣa ca||5||
svabhāvadarśanīyo'pi vairūpyamagamat param|
cintayāpsarasāṃ caiva niyamenāyatena ca||6||
prastāveṣvapi bhāryāyāṃ priyabhāryastathāpi saḥ|
vītarāga ivātasthau na jaharṣa na cukṣubhe||7||
taṃ vyavasthitamājñāya bhāryārāgāt parāṅmukham|
abhigamyābravīnnandamānandaḥ praṇayādidam||8||
aho sadṛśamārabdhaṃ śrutamasyābhijanasya ca|
nigṛhītendriyaḥ svastho niyame yadi saṃsthitaḥ||9||
abhiṣvaktasya kāmeṣu rāgiṇo viṣayātmanaḥ|
yadiyaṃ saṃvidutpannā neyamalpena hetunā||10||
vyādhiralpena yatnena mṛduḥ pratinivāryate|
prabalaḥ prabalaireva yatnairnaśyati vā na vā||11||
durharo mānaso vyādhirbalavāṃśca tavābhavat|
vinivṛtto yadi [ca] te sarvathā dhṛtimānasi||12||
duṣkaraṃ sādhvanāryeṇa māninā caiva mārdavam|
atisargaśca lubdhena brahmacaryaṃ ca rāgiṇā||13||
ekastu mama saṃdehastavāsyāṃ niyame dhṛtau|
atrānunayamicchāmi vaktavyaṃ yadi manyase||14||
ārjavābhihitaṃ vākyaṃ na ca mantavyamanyathā|
rūkṣamapyāśaye śuddhe rukṣato naiti sajjanaḥ||15||
apriyaṃ hi hitaṃ snigdhamasnigdhamahitaṃ priyam|
durlabhaṃ tu priyahitaṃ svādu pathyamivauṣadham||16||
viśvāsaścārthacaryā ca sāmānyaṃ sukhaduḥkhayoḥ|
marṣaṇaṃ praṇayaścaiva mitravṛttiriyaṃ satām||17||
tadidaṃ tvāṃ vivakṣāmi praṇayānna jighāṃsayā|
tvacchreyo hi vivakṣā me yato nārhāmyupekṣitum||18||
apsarobhṛtako dharmaṃ carasītyabhidhīyase|
kimidaṃ bhūtamāhosvit parihāso'yamīdṛśaḥ||19||
yadi tāvadidaṃ satyaṃ vakṣyāmyatra yadauṣadham|
auddhatyamatha vaktṛṇāmabhidhāsyāmi tadrajaḥ||20||
ślakṣṇapūrvamatho tena hṛdi so'bhihatastadā|
dhyātvā dīrghaṃ niśaśvāsa kiñciccāvāṅmukho'bhavat||21||
tatastasyeṅgitaṃ jñātvā manaḥsaṃkalpasūcakam|
babhāṣe vākyamānando madhurodarkamapriyam||22||
ākāreṇāvagacchāmi tava dharmaprayojanam|
yajjñātvā tvayi jātaṃ me hāsyaṃ kāruṇyameva ca||23||
yathāsanārthaṃ skandhena kaścid gurvīṃ śilāṃ vahet|
tadvattvamapi kāmārthaṃ niyamaṃ voḍhumudyataḥ||24||
titāḍayiṣayā dṛpto yathā meṣo'parsati|
tadvadabrahmacaryāya brahmacaryamidaṃ tava||25||
cikrīṣanti yathā paṇyaṃ vaṇijo lābhalipsayā|
dharmacaryā tava tathā paṇyabhūtā na śāntaye||26||
yathā phalaviśeṣārtha bījaṃ vapati kārṣakaḥ|
tadvad viṣayakārpaṇyād viṣayāṃstyaktavānasi||27||
ākāṅkṣecca yathā rogaṃ pratīkārasukhepsayā|
duḥkhamanvicchati bhavāṃstathā viṣayatṛṣṇayā||28||
yathā paśyati madhveva na prapātamavekṣate|
paśyasyapsarasastadvad bhraṃśamante na paśyasi||29||
hṛdi kāmāgninā dīpte kāyena vahato vratam|
kimidaṃ brahmacaryaṃ te manasābrahmacāriṇaḥ||30||
saṃsāre vartamānena yadā cāpsarasastvayā|
prāptāstyaktāśca śataśastābhyaḥ kimiti te spṛhā||31||
tṛptirnāstīndhanairagnernāmbhasā lavaṇāmbhasaḥ|
nāpi kāmaiḥ satṛṣṇasya tasmāt kāmā na tṛṣtaye||32||
atṛptau sa kutaḥ śāntiraśāntau ca kutaḥ sukham|
asukhe ca kutaḥ prītiraprītau ca kuto ratiḥ||33||
riraṃsā yadi te tasmādadhyātme dhīyatāṃ manaḥ|
praśāntā cānavadyā ca nāstyadhyātmasamā ratiḥ||34||
na tatra kāryaṃ tūryaiste na strībhirna vibhūṣaṇaiḥ|
ekastvaṃ [yatra]tatrasthastayā ratyābhiraṃsyase||35||
mānasaṃ balavad duḥkhaṃ tarṣe tiṣṭhati tiṣṭhati|
taṃ tarṣaṃ chindhi duḥkhaṃ hi tṛṣṇā cāsti ca nāsti ca||36||
saṃpattau vā vipattau vā divā vā naktameva vā|
kāmeṣu hi satṛṣṇasya na śāntirupapadyate||37||
kāmānāṃ prārthanā duḥkhā prāptau tṛptirna vidyate|
viyogānniyataḥ śoko viyogaśca dhruvo divi||38||
kṛtvāpi duṣkaraṃ karma svarge labdhvāpi durlabham|
nṛlokaṃ punarevaiti pravāsāt svagṛhaṃ yathā||39||
yadā bhraṣṭasya kuśalaṃ śiṣṭaṃ kiṃcinna vidyate|
tiryakṣu pitṛloke vā narake copapadyate||40||
tasya bhuktavataḥ svarge viṣayānuttamānapi|
bhraṣṭasyārtasya duḥkhena kimāsvādaḥ karoti saḥ||41||
śyenāya prāṇivātsalyāt svamāṃsānyapi dattavān|
śiviḥ svargāt paribhraṣṭastādṛk kṛtvāpi duṣkaram||42||
śakrasyārdhāsanaṃ gatvā pūrvapārthiva eṃva yaḥ|
sa devatvaṃ gataḥ kāle māndhātādhaḥ punaryayau||43||
rājyaṃ kṛtvāpi devānāṃ papāta nahuṣo bhuvi|
prāptaḥ kila bhujaṃgatvaṃ nādyāpi parimucyate||44||
tathaivelivilo rājā rājavṛttena saṃskṛtaḥ|
svargaṃ gatvā punarbhraṣṭaḥ kūrmībhūtaḥ kilārṇave||45||
bhūridyumno yayātiśca te cānye ca nṛparṣabhāḥ|
karmabhirdyāmabhikrīya tatkṣayāt punaratyajan||46||
asurāḥ pūrvadevāstu surairapahṛtaśriyaḥ|
śriyaṃ samanuśocantaḥ pātālaṃ śaraṇaṃ yayuḥ||47||
kiṃ ca rājarṣibhistāvadasurairvā surādibhiḥ|
mahendrāḥ śataśaḥ peturmāhātmyamapi na sthiram||48||
saṃsadaṃ śobhāyitvaindrīmupendraścendravikramaḥ|
kṣīṇakarmā papātorvīṃ madhyādapsarasāṃ rasan||49||
hā caitraratha hā vāpi hā mandākini hā priye|
ityārtā vilapanto'pi gāṃ patanti divaukasaḥ||50||
tīvraṃ hyutpadyate duḥkhamiha tāvanmumūrṣatām|
kiṃ punaḥ patatāṃ svargādevānte sukhasevinām||51||
rajo gṛṇhanti vāsāṃsi mlāyanti paramāḥ srajaḥ|
gātrebhyo jāyate svedo ratirbhavati nāsane||52||
etānyādau nimittāni cyutau svargād divaukasām|
aniṣṭānīva martyānāmariṣṭāni mumūrṣatām||53||
sukhamutpadyate yacca divi kāmānupāśnatām|
yacca duḥkhaṃ nipatatāṃ duḥkhameva viśiṣyate||54||
tasmādasvantamatrāṇamaviśvāsyamatarpakam|
vijñāya kṣayiṇaṃ svargamapavarge matiṃ kuru||55||
aśarīraṃ bhavāgraṃ hi gatvāpi munirudrakaḥ|
karmaṇo'nte cyutastasmāt tiryagyoniṃ prapatsyate||56||
maitrayā saptavārṣikyā brahmalokamito gataḥ|
sunetraḥ punarāvṛtto garbhavāsamupeyivān||57||
yadā caiśvaryavanto'pi kṣayiṇaḥ svargavāsinaḥ|
ko nāma svargavāsaya kṣeṣṇave spṛhayed budhaḥ||58||
sūtreṇa baddho hi yathā vihaṃgo vyāvartate dūragato'pi bhūyaḥ|
ajñānasūtreṇa tathāvabaddho gato'pi dūraṃ punareti lokaḥ||59||
kṛtvā kālavilakṣaṇaṃ pratibhuvā mukto yathā bandhanād
bhuktvā veśmasukhānyatītya samayaṃ bhūyo viśed vandhanaṃ|
tadvad dyāṃ pratibhūvadātmaniyamairdhyānādibhiḥ prāptavān
kāle karmasu teṣu bhuktaviṣayeṣvākṛṣate gāṃ punaḥ||60||
antarjālagatāḥ pramattamanaso mīnāstaḍāge yathā
jānanti vyasanaṃ na rodhajanitaṃ svasthāścarantyambhasi|
antarlokagatāḥ kṛtārthamatayastadvaddivi dhyāyino
manyante śivamacyutaṃ dhruvamiti svaṃ sthānamāvartakam||61||
tajjanmavyādhimṛtyuvyasanaparigataṃ matvā jagadidaṃ
saṃsāre bhrāmyamāṇaṃ divi nṛṣu narake tiryak-pitṛṣu ca|
yattrāṇaṃ nirbhayaṃ yacchivamamarajaraṃ niḥśokamamṛtaṃ
taddhetorbrahmacaryaṃ cara jahi hi calaṃ svargaṃ prati rucim||62||
saundarananda mahākāvye "svarga kī hīnatā" nāma ekādaśa sarga samāpta||